Қаңтар оқиғасында оққа ұшқан Айкөркемнің әкесіне "жалған ақпарат таратқаны үшін" айыппұл салынды

Қаңтар оқиғасы кезінде оққа ұшқан төрт жасар Айкөркемнің әкесі Айдос Мелдеханұлына 69 мың теңге айыппұл салынған. Мұны Алматы қалалық соты Фейсбук парақшасында жариялаған.

Таяуда оның үстінен "көрінеу жалған ақпарат тарату" бабы бойынша іс қозғалған. Фейсбук желісіндегі "Алматы соттары" парақшасында Айдос Мелдеханұлына салынған айыппұлды былай түсіндірген:

"Алматы қаласының әкімшілік құқық бұзушылықтар жөніндегі мамандандырылған ауданаралық соты Мелдеханұлы жөнінде әкімшілік істі қарады. 8 қарашада Мелдеханұлы Фейсбукте бейнехабарлама жариялаған. Онда Мелдеханұлы 21 қазанда көршісінің шабуыл жасағанын, полиция қызметкерлері әрекет етпегенін мәлімдеген. Сондай-ақ "полиция органдары оның өтінішін қабылдамаған және қандай да бір сипатта әрекет етуге тырыспаған". Сот Мелдеханұлынан полицияға қандай да бір өтініш түспегенін анықтады. Ол учаскелік полиция қызметкерімен әңгімеде жанжалдың бейбіт жолмен шешілгенін айтқан. Осылайша, Меделханұлы желіде жалған ақпарат жариялаған".

Сот қаулысы әзірге күшіне енбеген.

Өткен аптада сот қызы Айкөркемнің өлімі жөніндегі іс бойынша Айдос Мелдеханұлын Қалмыстық кодекстің 119-бабымен ("Қауіпті жағдайда қалдыру") жауапқа тарту жөнінде жеке қаулы шығарған.

Айкөркем ісі бойынша Алматы гарнизонының соты 2022 жылы Қаңтар оқиғасы кезінде "өкілетін асыра пайдаланды" деп айыпталған әскери қызметкер Арман Жұманды ақтап шығарған.

Оның алдында прокурор Арман Жұманды жеті жыл жаза сұраған еді. Жәбірленуші тарап айыпталушының әрекетін сотта "өкілетін асыра пайдалану" бабымен емес, "адам өлтіру" бабымен қарауды және іске куәгер болып қатысып отырған бірнеше адамды жауапқа тартуды талап еткен.

Бас әскери прокуратура үкіммен келіспейтінін, прокурор сот шешіміне қарсылық білдіретінін сайтына жазған. Сот шешімі әзірге күшіне енген жоқ.

ОҚИ ОТЫРЫҢЫЗ

Қаңтарда оққа ұшқан Айкөркемнің ісі: Судья айыпталушы әскериді ақтады