Американдық мұнай компаниялары Қазақстан басшыларына пара берді, сөйтіп Қазақстан мұнайының ақшасы талан таражға салынды, АҚШтың заңдары бұзылды деген іс Нью Йорк қаласының сотында маусым айының 23-де тергеле басталады. Сотқа американдық екі азамат тартылып отыр. Миллиондаған доллар пара алғандардың бірі ретінде Қазақстан президенті Нұрсұлтан Назарбаев аталып келеді. Қазақстан басшысы бұл жөнінде осы күнге шейін тіс жармады. Маусымның он екінші жұлдызында бұл үнсіздіктің шегі жетті. Нұрсұлтан Назарбаев британдық "Файненшл таймс" газетіне берген сұхбатында өзінің атына тағылған күдіктің барлығын жоққа шығарды.
